Garci Giayran ni Zubiri

By: Aurell P. Arais


Nanganti si Gobernador Jose Maria Zubiri nga bisan unsay mahitabo dili ug dili gayud niya sabakon si kanhi Comelec Commissioner Virgilio Garcillano sa pagkakongresista sa unang distrito ning lalawigan sa Bukidnon.

Sa paghinabi sa Radyo Bandilyo, si Zubiri miingon nga bisan unsaon dili mahitabo nga iyang paluyuhan sa iyang kandidatura si Garcillano isip representante.

“Nganong ako man siyang sabakon sa pulitika nga kontrobersiyal man na siya. Dili gyud ko magsabak sa usa ka tawo nga kontrobersiyal labaw na gyud si Garcillano. Sukad masukad pa, kontrobersiyal na kanang daan. Unsa naman lang ang ikasulti sa mga tawo nga hasta ko mosabak sa tawo nga kontrobersiyal”, sigun pa ni Zubiri.

Matod sa gobernador nga bisan manduan pa siya sa malakanyang, di gayud mahitabo nga iyang tunlon si Garci.

Sayo niini, mipagawas ug pamahayag ang malakanyang nga suportado sa administrasyon si Garcillano sa iyang kandidatura.

Apan giingon ni Zubiri nga dihang iyang gisukna si First Gentleman Mike Arroyo kung tinuod ba nga suportado sa unang pamilya si Garci nangulipas ang unang ginoo.

“Nangutana ko kay presidente kay nagkita mi sa usa ka kasal nag-ingon siya nga dili, namalibad man sila. Didto man si First Gentleman, ingon ko ikaw man ang iyang gipanghinambog namalibad man siya, namalibad man silang tanan”, asoy pa ni Zubiri.

Apan gitataw ni Zubiri nga kung ugaling mogawas nga himoong official candidate sa mga arroyo si Garcillano andam niya kining sungagon ug tugbangan.

Gani gibutyag niini nga aduna na siyay giandam nga pang-atbang kang Garci sa unang distrito pagka-kongresista ilawom sa partido lakas si Edoy Pancrudo, kanhing board member sa lalawigan.

Kung mahinayon, mahimong tulo ang magtigi pagkarepresentante sa unang distrito sa Bukidnon, si Acosta, Garcillano ug Pancrudo.

=-###-=