Spiritual Adviser sa PDRC Gipatay

by: Aurell P. Arais

Malaybalay City - Padayon pang giimbestigahan hangtod karon sa kapulisan ning dakbayan sa Malaybalay ang misteryo nga naglimin sa kamatayon sa giilang spiritual adviser sa mga inmate sa Provincial Detention and Rehabilitation Center (PDRC).

Giila ang biktima nga si Art Pabillaran o mas naila sa sampit nga Tatay Art, 62 anyos, ulitawo ug mulopyo sa dalang San Isidro ning dakbayan.

Kahinumduman nga kaniadtong Hulyo 25, mga kapin kong kuwang alas otso y medya sa buntag, nakaplagan na lamang ang biktima nga nagbuy-od sa sawog sulod sa iyang gipuy-an na nabulit na sa kaugalingong dugo.

Sa pagresponde sa mga otoridad, patay na gayud ang biktima ug gituhuang linuog kining gipatay tali sa tungang gabi-i ngadto sa alas tres sa kaadlawon.

Adunay samad nga nakita sa iyang aping ug adunay agi sa daw gituok ang iyang liog.

Nahanaw usab ang usa ka VCD player nga gipang-iyahan sa biktima.

Sa pagsuwat ning balita padayon pang gisubay sa kapulisan ang motibo sa maong krimen.

Samtang dugtong niini, sa paghinabi sa DXDB giasoy ni Bishop Honesto Pacana S.J. DD ang obispo sa Diocese sa Malaybalay nga ang biktima usa ka volunteer nga spiritual adviser sa mga binilanggo sulod na sa hataas nga katuigan.

Samtang dakong kasubo ang gibati sa mga inmate sa PDRC nga mitug-an nga halos kada adlaw ilang kauban ang biktima ug nagasilbing kadasig sa mga inmate nga halos gikalimtan na sa ilang mga mahal sa kinabuhi gumikan kay wa nay dalaw sulod na sa taas nga panahon.

=-###=-