Sunday, December 3, 2006

Acosta Pabiling Supak Sa Bukidnon Del Sur

ACOSTA PABILING SUPAK SA BUKIDNON DEL SUR
By: Aurell P. Arais

Malaybalay City – Dako ang mausik sa panudlanan sa kagamhanan kung ihinayon ang pagtipak sa probinsiya sa Bukidnon pinaagi sa pagmugna sa Bukidnon del Sur.

Kini ang punto ni 1st district representative Nerius Acosta nganong iyang hugtanon nga gisupak ang nahisgutang lakang.

Ang House Bill 3312 nga gipangamahanan ni 3rd district representative Miguel Zubiri, nagtinguha sa pagmugna ug bag-ong probinsiya nga pagawatgon ug Bukidnon del sur nga diin langkuban sa 10 ka mga lungsod gikan sa 20 ka mga lungsod sa probinsiya.

Kung matuman ang maong lakang ni Zubiri, mapahakan ang lungsod sa Kalilangan ug Pangantucan, nga sakop sa distrito ni Acosta.

Sa paghinabi sa DXDB Radyo Bandilyo, iyang gibutyag nga ang pagmugna ug bag-ong probinsiya magkahulugan sa paggasto ug kapin kon kulang 500 milyones ka pesos.

“Kung tungaon man gud ang Bukidnon, magkinahanglan na sab ug bag-ong kapitolyo, mga bag-ong mga opisyal gikan sa SP hangtod sa gobernador, bag-ong mga pulis, provincial jail, provincial hospital ug daghan pa, wa pay labot ang mga trabahante nga gikinahanglan. Why not use that money for delivering basic services which the people of Bukidnon need most”, matod pa ni Acosta.

Duda usab si Acosta sa argumento ni Zubiri nga ang pagtunga sa probinsiya sa Bukidnon alang sa kalambuan.

“Ngano duna bay investor nga miingon nga ayha pa siya mobubo sa iyang investment kung naa nay Bukidnon del Sur?” dugang pa ni Acosta.

Gani matod pa niya, mogamay ang Internal Revenue Allotment sa probinsiya gumikan kay madungagan naman unya ang magbahin sa IRA share.

Gisaway usab ni Acosta ang maong sugyot sanglit matod pa dili klaro kung ang financial obligations sa probinsya nga sa iyang pagbana-bana mokapin 300 milyones pesos kinsa ang mosagubang, ang karaan o ang bag-ong probinsiya ba.

Sa dihang nahinabi si Zubiri sa miaging mga bulan, iyang gikanayon nga kung namugna ang mga bag-ong probinsiya sama sa Compostela Valley Province ug Zamboanga Sibugay, way rason usab nga dili kini mahitabo sa Bukidnon.

Giingon usab niini nga ang probinsiya sa Bukidnon nga adunay land area nga mokabat 8,293.8 square kilometer dako ra kayo alang sa usa ka gobernador.

Ang HB 3312 ni Zubiri, anaa na sa hawanan sa senado ug gani duna nay napahigayon nga public hearing dili pa lamang dugay didto sa Cagayan de Oro City.

=-###=-

No comments: