Sunday, December 17, 2006

Pulis Nga Magpabuto ug Pusil Tangtagalon

by: Aurell P. Arais


Tanggalon sa serbisyo.

Kini ang hugtanon nga baud ni Police Chief Inspector Reynaldo Padulla, hepe sa kapulisan sa dakbayan sa Malyabalay alang sa iyang mga ginsakupan.

Gitumbok sa maong pahimangno mao ang mga pulis nga mogamit sa ilang pusil sa pagpabuto panahon sa pasko ug sa pagsugat sa bag-ong tuig.

Matod niya base sa direktiba nga nadawat gikan sa hataas nga buhatan sa kapulisan, dismissal from the service ang samputan sa membro sa PNP nga magpabuto sa ilang armas.

Kalakip na usab sa maong pahimangno ang mga sibilyan nga adunay armas.

Sigun sa kasinatian, ubay-ubay na mga kinabuhi ang nakalas sa way hinungdan sa nagkadaiyang bahin sa atong nasod gumikan sa mga saag nga bala panahon sa pasko ug bag-ong tuig.

Miapela usab si Padulla sa katawhan nga mubulig sa pagpatuman sa naasoy nga kamanduan pinaagi sa paghatag ug impormasyon kaniya o pagpasaka ug sumbong kung ugaling adunay pulis nga magpabuto o magpabadlong diha sa katilingban.

"Priority karon sa PNP ang paghinlo sa organisasyon, maong dapat matino ang mga pulis, ang musupak dismissal ang paingnan, of course with due process", matod pa ni Padulla.


-=###-=