Thursday, December 14, 2006

CPOC Meeting sa Malaybalay Nagmalampuson

By: Aurell Arais/ Alvin Lim

Malaybalay City – Malampusong gipahigayon dili pa lamang dugay ang tigum sa mga sakop sa city peace and order council kon CPOC nga gipahigayon sa Farmers Training Center, City Agriculture Office ning dakbayan.

Nahisgutan sa panagtigum ang mga aktibidades, mga isyu ug rekomindasyon kabahin sa crime situation ug insurhensiya ug ang mga plano ug proyekto sulod sa Enero hangtud Nobyembre ning tuig kasamtangan.

Sa iyang report, gibutyag ni Police Inspector Reynaldo Padulla, hepe sa kapulisan sa dakbayan nga mokabat 63 ka mga pinangita sa balaud ang ilang naaresto lakip na niini ang 6 sa 10 ka mga most wanted sa siyudad sulod lamang sa 2005 ug ning kasamtangang tuig.

Atol usab sa maong tigum, nahidangat si PNP 10 Regional director Teodorico Capuyan ug mainitong gidawat ni Mayor Florencio Flores Jr. ug sa mga sakop sa CPOC.

Sa iyang pagpamulong, pormal nga gidasig ni Capuyan ang CPOC sa padayon ug malahutayon nga pagtinabangay alang sa kahusay ug kalinaw sa dakbayan.

Matod pa niya, nag-una niyang prayoridad isip bag-ong PNP regional director ang pagpalagsik ug balik sa mga peace and order council sa nagkadaiyang dapit sa rehiyon 10 sa pagtuo nga kini dako ug ikatabang sa kampanya sa kapulisan.

Gibutyag usab ni Capuyan nga sa sunod tuig, magasugod na ang pagpatuman sa programa sa Department of Interior and Local Government kon DILG nga mao ang pagdeputize sa mga barangay tanod ngadto sa PNP.

Gipasabot sa maong opisyal nga gikan sa ma-deputize pagapilion ang special force ug pagatawgon nga police auxillary susama sa Special Cafgu Auxiallary sa mga kabahin sa mga sundawo nga hayan tugutan nga magbaton ug armas.

Hinoon gibutyag ni Capuyan nga inanay ang pagpatuman sa maong proyekto ug pagapilion lamang ang mga dapit nga kini i-implementar.

Sumala usab niya nga kasamtangan pang giplantsa ang proseso sa maong programa aron hapsay kini nga ipatuman sa tibook nasud sa Pilipinas.

Usa kini ka paagi sa pagpakusog sa kampanya batok sa giingong terorista.

=-###=-

No comments: